ក្រុងប៉ោយប៉ែត៖ មានករណីផ្ទុះអាវុធ ជិត២០គ្រាប់ទាំងកណ្ដាលយប់ បណ្តាលឲ្យមានអ្នករងរបួសស្រាលជាច្រើននាក់ និងរបួសធ្ងន់ម្នាក់ ជាមន្ត្រីកងរាជអាវុធហត្ថមិនស្គាល់អត្តសញ្ញាណ បើយោងតាមប្រភពពីអ្នកកន្លែងកើតហេតុ ។
ហេតុការនេះកើតឡើង នៅចំណុច ហាងផឹកសុីមួយកន្លែងខាងមុខកាសុីណូ ប៉ារ៉ាមិច ស្តិតក្នុងភូមិសាស្ត្រ កាសុីណូផ្កាយ៥ ក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ នៅវេលាម៉ោង១១ និង ២៥ នាទី យប់ថ្ងៃទី២០ ខែវិច្ឆិកា ឆ្នាំ២០២១ ។ តាមប្រភពបានឲ្យដឹងថា ការផ្ទុះអាវុធនេះ បង្ករឡើងរវាងជនជាតិថៃ និង ជនជាតិខ្មែរ ដែលត្រូវបានគេដឹងថា មានតួនាទីជាមន្ត្រីប៉េអិម បន្ទាប់ពី ឈ្លោះប្រកែកនិង ប្រតាយប្រតប់គ្នា ក្នុងទូកុងតឺន័រ សំរាប់អង្គុយផឹកសុី ។
ដោយយោងតាមសេចក្តីរាយការណ៍ មកពីកន្លែងកើតហេតុ បានសារព័ត៌មានឲ្យដឹងទៀតថា ក្នុងហេតុការណ៍នេះ ផ្ទុះអាវុធជិត២០គ្រាប់ បណ្តាលឲ្យ មានអ្នករងរបួសជាង១០នាក់ ក្នុងនោះ មន្ត្រីប៉េអិមម្នាក់រងរបួសធ្ងន់ ត្រូវ បានបញ្ជូនទៅសង្រ្គោះបន្ទាន់នៅមន្ទីរពេទ្យ ។
ក្រោយកើតហេតុ គេសង្កេតឃើញថា ក៏មានវត្តមាន របស់លោកឧត្តមសេនីយ៍ត្រី បោន ប៊ិន មេបញ្ជាការ កងរាជអាវុធហត្ថខេត្ត បន្ទាយមានជ័យ និងអាជ្ញាធរ ក្នុងមូលដ្ឋានជាច្រើនទៀត បានចុះទៅទីតាំងនោះ ។
តែទោះជាយ៉ាងណាសារព័ត៌មានយើង គេនៅមិនទាន់ដឹងពីមួលហេតុនៅឡើយទេ ថាតើជនជាតិថៃ និង ជនជាតិខ្មែរ ដែលមានតួនាទី ជាមន្ត្រីប៉េអិម មានរឿងអ្វីនិងគ្នាអោយពិតប្រាកដនោះទេ ទើបឈានដល់ការផ្ទុះអាវុធដាក់គ្នាបែបនេះ។
ដោយក្នុងនោះដែរ បើតាមមតិមហាជនបានលើកឡើង ថា ប្រហែលជា ជនជាតិ ថៃ និង ជនជាតិខ្មែរ ជាមន្ត្រី ប៉េអិម ប្រហែលជា មានទំនាស់គ្នា ក្នុងការរកសុី ឬ ចែកភាគរយ គ្នាមិនត្រូវហើយ ទើបផ្ទុះអាវុធដាក់គ្នាទៅវិញទៅមកបែបនេះ ។
ជុំវិញបញ្ហាខាងនេះដែរនៅព្រឹកថ្ងៃទី ២១ ខែវិច្ឆិកា ឆ្នាំ២០២១នេះ លោកឧត្តមសេនីយ៍ត្រី នូ ជីវ័ន្ដ ស្នងការ រង ទទួលផែន ព្រហ្មទណ្ឌ កម្រិតធ្ងន់ នៃស្នងការនគរបាលខេត្ត បន្ទាយមានជ័យ បានប្រាប់សារព័ត៌មាន យើងឲ្យដឹងថា ករណីនេះលោកក៏មិនទាន់ច្បាស់ដែរ ដោយសារការងារនេះ ខាងកងរាជអាវុធហត្ថ ជាអ្នកធ្វើការ ។
រីឯលោក នួន នីណារ៉ូ មេបញ្ជាការ មូលដ្ឋានកងរាជ អាវុធហត្ថ ក្រុងប៉ោយប៉ែត សារព័ត៌មានយើង មិនអាចសុំការបំភ្លឺ បានទេដោយសារ ខលចូលជាច្រើនដង បែរជា គ្មានអ្នកទទួលទូរស័ព្ទ ៕