សមត្ថកិច្ចស្រុកឆែប ខេត្តព្រះវិហារ បានចុះបង្ក្រាបបទល្មើសកែច្នៃឈើ ៤កន្លែង ដកហូតតាបឈូសឈើ និងឧបករណ៍កែច្នៃឈើបាន១០គ្រឿង ព្រមទាំងដកហូតឈើអារ បានជិត ១ម៉ែត្រគូបត្រីគុណ ថែមទៀតផង !
ខេត្តព្រះវិហារ៖ ឈើអារជិត១ម៉ែត្រគូបត្រីគុណ តាបឈូសឈើ រួមនឹងឧបករណ៍ម៉ាស៊ីនកែច្នៃឈើ ១០គ្រឿង ត្រូវបានកម្លាំងការិយាល័យ ដែនជម្រកសត្វព្រៃព្រះរការ ដែនជម្រសត្វព្រៃឆែប សហការណ៍ជាមួយ កម្លាំងអធិការដ្ឋាននគរបាលស្រុកឆែប ប៉ុស្តិ៍នគរបាលរដ្ឋបាលឆែបពីរ ចុះបង្ក្រាប និងដកហូតបាន ពីក្នុងរោងសិប្បកម្មកែច្នៃឈើខុសច្បាប់ ចំនួន ៤កន្លែង។ ប្រតិបត្តិការនេះ បានធ្វើឡើងរយះពេលពីរថ្ងៃបន្តបន្ទាប់គ្នា ចន្លោះពីថ្ងៃទី៧ឧសភា និងថ្ងៃទី៩ឧសភាឆ្នាំ២០២០ ស្ថិតនៅក្នុង ភូមិគុណភាពពីរ ឃុំឆែបពីរ ស្រុកឆែប ខេត្តព្រះវិហារ ។
ប្រធានការិយាល័យ ដែនជម្រកសត្វព្រៃព្រះរការ-ឆែប លោក យ៉ាន់ ប៊ុនសឿង បានប្រាប់អោយដឹងថា ដោយមានការណែនាំពី ប្រធានមន្ទីរបរិស្ថានខេត្ត ក៏ដូចជា អភិបាល នៃគណៈអភិបាលស្រុកឆែបផងនោះ ការិយាល័យ ដែនជម្រកសត្វព្រៃព្រះរការ-ឆែប បានសហការណ៍ជាមួយ កម្លាំងអធិការដ្ឋាននគរបាលស្រុកឆែប រួមនឹងកម្លាំងប៉ុស្តិ៍នគរបាលរដ្ឋបាលឆែប២ បានបើកប្រតិបត្តិការចុះបង្ក្រាប ទីតាំងបើករោងសិប្បកម្មកែច្នៃឈើ ល្មើសច្បាប់ចំនួន ៤កន្លែង ដោយបានធ្វើឡើងនៅចន្លោះពីថ្ងៃទី៧ឧសភា និងថ្ងៃទី៩ឧសភាឆ្នាំ២០២០ ដែលស្ថិតនៅទីតាំងបង្ក្រាបខាងលើ។
លោក យ៉ាន់ ប៊ុនសឿង បានបន្តទៀតថា ការបង្ក្រាបនៅថ្ងៃទី៧ឧសភា២០២០ កម្លាំងសមត្ថកិច្ច បានដកហូតបាន តាបម៉ាស៊ីនឈូសឈើ ៣គ្រឿង ម៉ាស៊ីន ៣គ្រឿង និងឌីណាម៉ូអូសភ្លើង ១គ្រឿង ទៀតផងដែរ។ រីឯ ការបង្ក្រាបនៅថ្ងៃទី៩ឧសភា២០២០ កម្លាំងសមត្ថកិច្ចដកហូតបាន តាបម៉ាស៊ីនឈូសឈើ ១គ្រឿង ម៉ាស៊ីន ១គ្រឿង ឌីណាម៉ូអូសភ្លើង ១គ្រឿង និងឈើអារប្រភេទផ្ចឹក ២៥សន្លឹក ស្មើនឹង០.៧៥ ម៉ែត្រគូបត្រីគុណ។ លោកបានបញ្ជាក់ថា ការបង្ក្រាបនៅក្នុងរយះពេលពីរថ្ងៃកន្លងមកនេះ សមត្ថកិច្ចរឹបអូសបានវត្ថុតាងបទល្មើស មានតាបម៉ាស៊ីនឈូសឈើ ៤គ្រឿង ម៉ាស៊ីនភ្លើង ៤គ្រឿង ឌីណាម៉ូអូសភ្លើង ២គ្រឿង សរុប ១០គ្រឿង រួមនឹឈើអារប្រភេទផ្ចឹក ជិត១ម៉ែត្រគូបត្រីគុណ ផងដែរ។ ហើយវត្ថុតាងបទល្មើសទាំងអស់ ត្រូវបាននាំយកមករក្សាទុកនៅ ស្នាក់ការបរិស្ថានម៉រកែវ ស្ថិតនៅក្នុងភូមិណារ៉ុង ឃុំឆែបពីរ ស្រុកឆែប ខេដើម្បីចងក្រងសំណុំរឿង ចាត់ការតាមច្បាប់ ៕
