ខេត្តបន្ទាយមានជ័យ៖ ពីព្រឹកថ្ងៃទី២៩ ខែវិច្ឆិកា ឆ្នាំ២០២០ មកក្រុមការងារឆ្លើយតបបន្ទាន់(RRT )នៃមន្ទីរសុខាភិបាលខេត្តបន្ទាយមានជ័យ បាននឹងកំពុងបន្តយកវត្ថុសំណាកវិភាគ ដើម្បីបញ្ជូនទៅមន្ទីរពិសោធន៍នៃវិទ្យាស្ថានប៉ាស្ទ័រ រាជធានីភ្នំពេញ ដើម្បីរកមេរោគនៃជម្ងឺកូវីត១៩ លើមន្ត្រីនិងអ្នកពាក់ព័ន្ធផ្ទាល់ និងប្រយោលជាច្រើននាក់នៅខេត្តបន្ទាយមានជ័យ។លោកវេជ្ជបណ្ឌិត ឡេ ច័ន្ទសង្វាត ប្រធានមន្ទីរសុខាភិបាលនៃរដ្ឋបាលខេត្តបន្ទាយមាជ័យ អោយដឹងថ្ងៃទី២៩ខែវិច្ឆិកាថា៖ " សកម្មភាពនេះធ្វើឡើងក្រោមការដឹកនាំ សម្របសម្រួល ដោយឯកឧត្តម អ៊ុំ រាត្រី អភិបាកខេត្ត និងដោយមានការសហការចូលរួម ពី ឯកឧត្តម លោកជំទាវ លោក លោកស្រី ដែលជាអ្នកបានប៉ះពាល់ផ្ទាល់ និងប្រយោល(នឹងឯកឧត្តមអគ្គនាយកនៃអគ្គនាយកដ្ឋានពន្ធនាគារនិងអ្នកពាក់ព័ន្ធ) បានយ៉ាងរលូន ប្រកបដោយការទទួលខុសត្រូវ ក្នុងការបង្ការទប់ស្កាត់ កូវីដ១៩ ទាំងអស់គ្នា " ។
ជាក់ស្តែងនៅមហាសាលប្រជុំនៃមន្ទីរសុខាភិបាលខេត្តបន្ទាយមានជ័យនាព្រឹកដដែលនោះ ដោយមានមន្ត្រីថ្នាក់ដឹកនាំ មន្ត្រីរាជការស៊ីវិល កងកម្លាំង រួមទាំងមន្ត្រីពន្ធនាគារនុរក្ស សរុបរាប់សិបរយនាក់បានទៅសុំផ្តល់សំណាក់ធ្វើតេស្ត។ នៅចំពោះវត្តមានដ៏ច្រើននេះ លោកវេជ្ជបណ្ឌិត ឡេ ច័ន្ទសង្វាត បានប្រកាសថា គ្រូពេទ្យនិងមន្ត្រីជំនាញក្រុមRRTនៃមន្ទីរសុខាភិបាលខេត្តបន្ទាយមានជ័យសុំធ្វើតែអ្នកទាំងឡាយណាដែលបានប៉ះពាល់ផ្ទាល់សិនប៉ុណ្ណោះ ។
ពោលគឺប៉ះពាល់នឹងលោកព្រះរាជអាជ្ញា ព្រះរាជអជ្ញារង មេបញ្ជារការ ស្នងការ ស្នងការរង លោកប្រធាន អនុប្រធានពន្ធនាគារ ពន្ធនាគារនុរក្ស បន្ទាប់ពីមន្ត្រីទាំងដែលធ្លាប់ប៉ះពាល់ផ្ទាល់នឹងលោកឧត្តមអគ្គានុរក្ស ថ្នាក់លេខ១ ឆែម សាវុធ អគ្គនាយក នៃអគ្គនាយកដ្ឋានពន្ធនាគារក្រសួងមហាផ្ទៃកាលពីថ្ងៃទី១៣ ខែវិច្ឆិកា ឆ្នាំ២០២០ នៅទីតាំងពន្ធនាគារខេត្តបន្ទាយមានជ័យ ក្នុងភូមិគាប សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ ខណៈទទួលការវិលត្រឡប់មកវិញនូវអ្នកជាប់ឃុំជាង១.៦០០នាក់ ក្រោយទឹកជំនន់ស្រក។
សូមរំលឹកថា ក្នុងប្រតិបត្តិការទទួលអ្នកជាប់ឃុំវិលវិញនៅពន្ធនាគារខេត្តបន្ទាយមាជ័យតាំងពីថ្ងៃទី១៣ ខែវិច្ឆិកា ឆ្នាំ២០២០ ក្រៅពីលោកឧត្តមអគ្គានុរក្សថ្នាក់លេខ១ ឆែម សាវុធ អគ្គនាយក(ដែលភរិយាគាត់បានវិជ្ជមានកូវីត១៩ ) ក៏មានអគ្គនាយករង មន្ត្រី និងដោយមានការចូលរួមលោក ព្រះរាជអាជ្ញា ព្រះរាជអាជ្ញារង អមសាលាដំបូងខេត្តបន្ទាយមានជ័យ លោកឧត្តមសេនីយ៍ត្រីស្នងការនគរបាលខេត្តបន្ទាយមានជ័យ លោកឧត្តមសេនីយ៍ត្រីមេបញ្ជាការកងរាជអាវុធហត្ថខេត្តបន្ទាយមានជ័យ លោកឧត្តមអគ្គានុរក្ស ថ្នាក់លេខ២ ប្រធានពន្ធនាគារខេត្តបន្ទាយមានជ័យ លោក លោកស្រី កងកម្លាំង មន្ត្រីពន្ធនាគារនុរក្ស ក្រុមការងារជាច្រើនរយនាក់នាក់ទៀតបានចូលរួម ។
ប្រភពព័ត៌មានបានប្រាប់ថា ក្នុងខណណៈនេះដែរ អ្នកពាក់ព័ន្ធដែលប៉ះពាក់ព័ន្ធផ្ទាល់និងប្រយោលជាបន្តបន្ទាប់នឹងមន្ត្រីដូចខាងលើ ក៏សម្រុកមកសុំផ្តល់សំណាកវិភាគជាមួយក្រុមការងារRRT ឯមន្ត្រីដែលបានផ្តល់សំណាកវិភាគហើយ ក៏បានចេញទៅធ្វើចត្តាឡីស័កនៅដាច់ដោយឡែកពីគេនិងរង់ចាំលទ្ធផលតេស្ត ថាតើវិជ្ជមានឬអវិជ្ជមានកូវីត១៩ ៕