ខេត្តកំពង់ស្ពឺ ៖ នាព្រឹកថ្ងៃសៅរ៍ ១៤រោជ ខែកត្តិក ឆ្នាំជូត ទោសក ព.ស២៥៦៤ ត្រូវនិងថ្ងៃទី១៤ ខែវិច្ឆិកា ឆ្នាំ២០២០ លោក ឃិត ឈឿន អគ្គនាយកក្រុមហ៊ុនចំរើនសម្បត្តិ ខនស្រ្តាក់សិន ឯ.ក និងលោក ហ៊ុល សេដ្ឋា អគ្គនាយកក្រុមហ៊ុន ម៉ូរីហ្គា ខ្មែរ អេហ្គ្រីខលឆឺរីល បាយអូថេកណឡជី ឯ.ក រួមដំណើរដោយ លោក តាំង វណ្ណា និងក្រុមការងារចុះជួបសំណះសំណាល សួរសុខទុក្ខ និងចែកអំណោយជូនបងប្អូនប្រជាពលរដ្ឋចំនួន ៣០គ្រួសារ ស្ថិតនៅក្នុងភូមិត្រពាំងធ្លក ឃុំស្វាយចចិប ស្រុកបសេដ្ឋ ខេត្តកំពង់ស្ពឺ ។
ក្នុងពិធីចែកអំណោយនោះ លោក ឃិត ឈឿន អគ្គនាយកក្រុមហ៊ុនចំរើនសម្បត្តិ ខនស្រ្តាក់សិន ឯ.ក បានមានប្រសាសន៍ថា អំណោយដែលចែកជូនបងប្អូនថ្ងៃនេះ គឺកើតចេញពីទឹកចិត្តរបស់លោក ក្រុមគ្រួសារ សប្បុរសជន រួមជាមួយនិងក្រុមការងារនៅក្នុងក្រុមហ៊ុនទាំងមូល។ ថ្វីត្បឹតតែអំណោយនេះមានចំនួនតិចតួចស្តួចស្តើង តែក៏អាចជួយសម្រួលដល់ជីវភាពរបស់បងប្អូនបានមួយកំរឹតផងដែរ។
លោក ហ៊ុល សេដ្ឋា អគ្គនាយកក្រុមហ៊ុន ម៉ូរីហ្គា ខ្មែរ បានសម្តែងនូវក្តីរីករាយជាមួយបងប្អូនប្រជាពលរដ្ឋ ហើយក៏បានផ្តាំផ្ញើបងប្អូនអោយចេះគោរព ស្រលាញ់ សាមគ្គីគ្នានៅក្នុងសហគមន៍ ត្រូវប្រកាន់នូវក្បួនអនាម័យ ផឹកស្អាត ហូបស្អាត រសនៅស្អាត និងអនុវត្តតាមការណែនាំរបស់ក្រសួងសុខាភិបាល។ អំណោយដែលបានចែកជូន គឺ ក្នុងមួយគ្រួសារទទួលបាន អង្ករ ២៥គីឡូក្រាម មីជាតិ ១កេះ ទឹកត្រី ១យួរ ទឹកស៊ីអ៊ីវ ១យួរ ប្រេងឆា ១ដប សាប៊ូបោកខោអាវ ១ដប អាវរងារចំនួន៣ និងថវិកា ២ម៉ឺនរៀល។
គួររំលឹកផងដែរថា កាលពីថ្ងៃទី១២ ខែវិច្ឆិកា ឆ្នាំ២០២០ មានការប្រារពពិធីចុះអនុស្សារណៈយោគយល់គ្នារវាងក្រុមហ៊ុនចំនួន ២ ៖ ទី១ ក្រុមហ៊ុនចំរើនសម្បត្តិខនស្ត្រាក់សិនឯ.ក ជាមួយនឹងក្រុមហ៊ុនម៉ូរីនហ្គា ខ្មែរ អេហ្គ្រីខលឆឺរីល បាយអូថេកណឡជី ឯ.ក លើគម្រោងដាំដុះដំណាំម្រុំលើផ្ទៃដី ៥០០ ហិចតាក្នុងខេត្តកំពង់ស្ពឺ និងទី២ ផ្សារខេស៊ី ផ្សារចំណេះដឹង ផ្សារមុខរប ជាមួយនឹងក្រុមហ៊ុនឃែសផ្លាស ឃែភីថល អ៊ិនវេសម៉ិនឯ.ក លើកគម្រោងការកសាងសមត្ថភាព ចំណេះដឹង ជំនាញយុវជនដោយមិនគិតថ្លៃលើវិស័យឌីជីថល និងពង្រីកទីផ្សារផលិតផលក្នុងស្រុកគុណភាពខ្ពស់តាមរយៈទីផ្សារអនឡាញ។